Dhoma Amerikane e Tregtisë (AmCham) ka reaguar ndaj projektvendimit të Këshillit të Ministrave për miratimin e rregullores mbi procedurat e vlerësimit dhe shqyrtimit të investimeve të huaja direkte. Ky projekt, i nxjerrë për konsultim publik më 7 janar 2026, synon të filtrojë investimet në infrastrukturën publike kritike, teknologjitë kritike, furnizimin me inpute kritike, aksesin në informacion të ndjeshëm dhe lirinë e medias, me qëllim mbrojtjen e sigurisë kombëtare.
AmCham e konsideron këtë nismë një hap të rëndësishëm për përafrimin me acquis të Bashkimit Evropian, veçanërisht Rregulloren (BE) 2019/452, dhe një instrument të domosdoshëm për sigurinë kombëtare dhe rendin publik. Megjithatë, analiza juridike dhe institucionale e Dhomës identifikon probleme thelbësore në draftin aktual, si pasiguria juridike, cenimi i parimit të proporcionalitetit dhe rreziku i dekurajimit të investitorëve seriozë.
Problemet e Identifikuara nga AmCham
• Niveli normativ: Procesi i shqyrtimit të investimeve është kompleks dhe ndikon drejtpërdrejt në të drejtat e investitorëve dhe ekonominë. AmCham vlerëson se një vendim i Këshillit të Ministrave nuk ofron bazë të mjaftueshme ligjore; kërkohet një ligj i posaçëm për të adresuar gjithëpërfshirësisht elementet e procesit, duke reduktuar interpretime subjektive.
• Përputhja me BE: Drafti nuk është plotësisht i harmonizuar me legjislacionin evropian dhe nuk garanton transparencë të mjaftueshme në kriteret e vlerësimit.
• Transparenca dhe parashikueshmëria: Mekanizmi mund të krijojë pasiguri për investitorët, duke penguar nxitjen e kapitalit të huaj, veçanërisht atij amerikan, i cili është motor i zhvillimit ekonomik.
AmCham ka dërguar një letër zyrtare Ministres së Ekonomisë dhe Inovacionit, për dijeni të sekretarit të përgjithshëm të Këshillit të Ministrave, ku parashtron nevojën për përmirësime që balancojnë sigurinë kombëtare me sigurinë juridike. Ajo thekson se një kuadër ligjor i qartë do të rrisë përgjegjësinë e investitorëve për origjinën e fondeve dhe do të mbështesë iniciativat investuese përmes transparencës.