Policia e Elbasanit finalizoi operacionin e koduar Transit, duke arrestuar në flagrancë tre shtetase kolumbiane për ushtrimin e prostitucionit në dy apartamente në qytet.
Operacioni u zhvillua nga Seksioni për Hetimin e Trafiqeve i Drejtorisë Vendore të Policisë Elbasan, në bashkëpunim me Seksionin për Mbështetjen Operacionale, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Elbasan. Nga hetimet intensive me metoda speciale u provua se shtetaset kontaktonin klientët përmes faqeve në internet.
U arrestuan shtetaset D. P., 20 vjeçe, D. M., 18 vjeçe dhe J. D., 34 vjeçe, të akuzuara për veprën penale të prostitucionit. Gjithashtu, nisi procedimi penal në gjendje të lirë ndaj shtetases M. J., 34 vjeçe, pronare e apartamenteve, për veprën penale të mbajtjes së ambienteve për prostitucion.
Gjatë kontrollit në ambientet e veprimtarisë së paligjshme, u sekuestruan shuma parash në valuta të ndryshme, të dyshuara si përfitime nga kjo veprimtari, si dhe celularë e dokumente identifikimi në cilësinë e provës materiale.
Prokuroria vazhdon punën për dokumentimin e plotë të veprimtarisë dhe identifikimin e personave të tjerë të mundshëm të përfshirë. Materialet procedurale u referuan Prokurorisë pranë Gjykatës së Shkallës së Parë të Elbasanit për veprime të mëtejshme.