Njësiti i Hetimeve të Përgjithshme të Prishtinës ka arrestuar një person të dyshuar për grabitjen e kryer më 26 dhjetor 2025 në një villë në Çagllavicë. Ngjarja ndodhi rreth orës 05:00, kur një individ i maskuar, i veshur me rroba të zeza dhe i armatosur, hyri në recepsionin e objektit dhe kërcënoi recepsionistin.
I dyshuari kërkoi para nën kërcënimin e armës, ndërsa viktima dorëzoi shumën prej 1.200 euro. Pas grabitjes, personi largohet në këmbë në drejtim të arave dhe zhduket. Policia e Kosovës konfirmon se i arrestuari quhet V.B., mashkull 32-vjeç dhe shtetas i Republikës së Kosovës.
Me vendim të prokurorit të shtetit, V.B. është dërguar në mbajtje. Hetimet vazhdojnë për kapjen e personit të dytë të dyshuar në këtë rast. Njoftimi zyrtar i policisë thekson se puna për identifikimin dhe arrestimin e bashkëpunëtorit po kryhet pa ndërprerje.