Presidenca e Bosnje e Hercegovinës, e cila mbikëqyr Forcat e Armatosura të Bosnjës, ka pajtuar në parim për vendosjen e trupave boshnjake në Rripin e Gazës. Kjo vjen si pjesë e misionit paqeruajtës të Forcës Ndërkombëtare të Stabilizimit.
Ministri i Mbrojtjes i Bosnjës do t'i njoftojë Shtetet e Bashkuara për gatishmërinë e Bosnjës për të dërguar anëtarë të Forcave të Armatosura në këtë mision, pas përfundimit të procedurës ligjore. Ai është ngarkuar gjithashtu me kryerjen e procesit të emërimit të përfaqësuesit ushtarak boshnjak në mision dhe paraqitjen e një propozimi për vendim në Presidencë.
Këshilli i Ministrave të Bosnjës do t'i paraqesë Presidencës një vlerësim mbi arsyet e pjesëmarrjes së anëtarëve të Forcave të Armatosura në misionin paqeruajtës në Gazë.
Vendimi lidhet me një rezolutë të miratuar nga Këshilli i Sigurimit i Kombeve të Bashkuara më 17 nëntor 2025, të hartuar nga SHBA. Kjo rezolutë mbështet planin 20-pikësh të presidentit Donald Trump për t'i dhënë fund luftës dyvjeçare në Rripin e Gazës dhe autorizon Forcën Ndërkombëtare të Stabilizimit për enklavën palestineze.
Izraeli dhe grupi palestinez Hamas, i shpallur organizatë terroriste nga SHBA dhe fuqi të tjera, kanë rënë dakord për fazën e parë të këtij plani. Kjo përfshin një armëpushim dhe një marrëveshje për lirimin e pengjeve.
Rezoluta e OKB-së konsiderohet thelbësore për legjitimimin e organit të përkohshëm qeverisës në Gazë dhe për ofrimin e garancive ndaj vendeve që po shqyrtojnë dërgimin e trupave. Teksti i saj parashikon se shtetet anëtare mund të marrin pjesë në Komitetin e Paqes të kryesuar nga Trump.