Një shpërthim ka ndodhur më 7 janar në qytetin Recife, kryeqytetin e shtetit Pernambuco në Brazil, ku dy të rinj janë lënduar si pasojë e një shpërthimi pranë fuçive metalike që dyshohet se përmbanin mbetje nafte ose avuj të ndezshëm.
Pamjet e regjistruara nga një kamerë sigurie tregojnë se njëri prej të rinjve qëndronte pranë një bidoni metalik të hapur, ndërsa tjetri ishte ulur mbi një fuçi tjetër. Sipas dyshimeve paraprake, brenda këtyre enëve kishin mbetur substanca të ndezshme. Fillimisht, njëri prej tyre përpiqej të ndizte me çakmak bidonin e hapur, por flaka ndizej vetëm lehtë dhe pa pasoja të menjëhershme.
Më pas, shoku i tij goditi me çekiç një bidon të mbyllur, duke hapur një vrimë të vogël në pjesën e sipërme. Në atë çast, burri me çakmak u afrua për të ndezur edhe këtë bidon, çka rezultoi fatale. Sapo flaka preku bidonin e mbyllur, ai shpërtheu me forcë, duke u ngritur në ajër dhe duke hedhur të dy të rinjtë disa metra larg. Njëri prej tyre u përplasa me kokë mbi bidonin ku kishte qenë ulur më herët, duke pësuar dëmtime serioze.
Autoritetet braziliane nuk kanë dhënë ende informacion zyrtar mbi gjendjen shëndetësore të të lënduarve. Videoja ka qarkulluar gjerësisht në rrjetet sociale, duke nxitur reagime të shumta dhe duke u përdorur si shembull për rreziqet e veprimeve të pakujdesshme pranë materialeve të ndezshme.