Në një tryezë të organizuar nga Partia Demokratike me përfaqësues të partive opozitare, shoqërisë civile dhe intelektualëve, më 9 janar 2026, aktori dhe aktivisti Florian Binaj mbajti një fjalim të shkurtër. Si kandidat i opozitës për kryetar bashkie të Tiranës, ai kërkoi bashkimin e forcave opozitare dhe bëri autokritikë ndaj tyre.
Binaj theksoi se gjatë viteve të fundit është humbur kohë duke u fokusuar te dallimet mes aktorëve politikë, në vend të ngjashmërive. "Gjatë gjithë kësaj kohe, kemi harxhuar kohë duke parë nga njëri-tjetri jo ku ngjajmë, por ku dallojmë", deklaroi ai. Sipas tij, arsyeja e këtij takimi është se të gjithë, duke përfshirë edhe ata që ndjekin nga shtëpia, nuk kanë bërë mjaftueshëm.
Ai nënvizoi nevojën për të pranuar njëri-tjetrin ashtu siç janë, pa pritur që të marrin formën e njëri-tjetrit. "Në këtë kohë që ka ardhur, mendoj se gjëja më e rëndësishme për të bërë është që për ta pranuar njëri-tjetrin ashtu siç jemi, të ndryshëm dhe të mos presim nga njëri-tjetri që ‘unë do bashkëpunoj me ty po more ti formën time ose unë formën tënde’", shtoi Binaj.
Aktivisti kritikoi përplasjet e tepërta dhe situatën aktuale të Shqipërisë, që sipas tij kërkon marrëveshje. "Jemi marrë mjaftueshëm nëpër këmbë, jemi sharë mjaftueshëm nëpër gojë, jemi marrë mjaftueshëm nëpërsysh, tani o duhet të merremi vesh, ose nuk duhet të qahemi pastaj nëse do na marrim më qaf", tha ai. Në fund, Binaj falënderoi pjesëmarrësit për ftesën dhe u largua nga tryeza për të marrë fëmijët nga shkolla, duke kërkuar vetëm 30 sekonda për fjalimin e tij.