Në tryezën e organizuar më 9 janar 2026 nga Partia Demokratike, me pjesëmarrjen e partive të opozitës, përfaqësuesve të shoqërisë civile dhe intelektualëve, aktori dhe aktivisti Florian Binaj mbajti një fjalë të shkurtër ku kërkoi bashkimin e forcave opozitare.
Sipas tij, gjatë viteve të fundit është humbur kohë duke u fokusuar te dallimet mes aktorëve politikë, në vend të ngjashmërive. “Gjatë gjithë kësaj kohe, kemi harxhuar kohë duke parë nga njëri-tjetri jo ku ngjajmë, por ku dallojmë. Në këtë kohë që ka ardhur, mendoj se gjëja më e rëndësishme për të bërë është që për ta pranuar njëri-tjetrin ashti siç jemi, të ndryshëm dhe të mos presim nga njëri-tjetri që ‘unë do bashkëpunoj me ty po more ti formën time ose unë formën tënde e t të tjera’”, theksoi Binaj.
Ai nënvizoi se përplasjet, fyerjet dhe konfliktet mes aktorëve politikë dhe shoqërorë kanë qenë të tepërta, ndërsa situata aktuale e Shqipërisë kërkon marrëveshje dhe bashkëpunim. “Jemi marrë mjaftueshëm nëpër këmbë, jemi sharë mjaftueshëm nëpër gojë, jemi marrë mjaftueshëm nëpërsysh, tani o duhet të merremi vesh, ose nuk duhet të qahemi pastaj nëse do na marrim më qaf”, deklaroi ai.
Binaj vuri në dukje se të gjithë aktorët kanë përgjegjësi për situatën e tanishme dhe se nuk është bërë mjaftueshëm për të reflektuar mbi atë që bashkon. Në përfundim të fjalës së tij, ai u largua nga tryeza duke përsëritur arsyen personale të largimit, një veprim që u konsiderua nga të pranishmit si thirrje për përgjegjësi, bashkëjetesë dhe veprim konkret.