Më 18 shkurt, katër ish-udhëheqës të Ushtrisë Çlirimtare të Kosovës (UÇK), Hashim Thaçi, Kadri Veseli, Jakup Krasniqi dhe Rexhep Selimi, pritet të paraqiten në Gjykatën Speciale në Hagë. Kjo datë shënon fundin e gjykimit të madh të njohur si "Thaçi dhe të tjerët".
Nënkryetari i Organizatës së Veteranëve të Luftës së UÇK-së (OVL UÇK), Gazmend Syla, në emisionin "Kosova Today", deklaroi se organizata nuk pret lajme të mira për Kosovën në shkurt. Ai theksoi se funksionimi i Gjykatës Speciale që nga themelimi nuk jep shpresa për një verdikt të favorshëm.
"Qysh ka funksionuar kjo gjykatë prej që është themeluar deri më tani, nuk na jep shumë shpresë që kemi me pas një lajm shumë të mirë kur të jepet verdikti final", tha Syla.
Ai shpjegoi synimet e organizatës gjatë kësaj periudhe. OVL UÇK-ja, në bashkëpunim me mediat, ka synuar të tërheqë vëmendjen mbi zhvillimet në Gjykatën Speciale, duke nxitur reagime nga publiku dhe duke komunikuar me bashkësinë ndërkombëtare.
"Krejt çka kemi bërë si Organizatë e Veteranëve të Luftës, së bashku me juve mediat, çka kemi dashur me thënë ka qenë: ‘Shihni çka po ndodh atje’. Prandaj kemi nxitur shumë njerëz me reagu, prandaj kemi komunikuar me bashkësinë ndërkombëtare se çfarë po ndodh në Gjykatën Speciale", u shpreh Syla.
Të gjitha këto përpjekje synojnë arritjen e epilogut që pritet të ndodhë në shkurt.