Gazetarja Klodiana Lala ka folur për disa dosje në hetim nga Struktura e Posaçme Kundër Korrupsionit dhe Krimit të Organizuar (SPAK), të cilat pritet të zhvillohen në vijim.
Duke u shprehur në emisionin e News 24-së, Lala ka theksuar se një nga dosjet më të rëndësishme është ajo e Agjencisë Kombëtare e Sigurimit të Informacionit (AKSHI), të cilën e ka cilësuar si hapje e kutisë së Pandorës. Sipas saj, kjo dosje ka potencialin të shkërmoqë përfundimisht qeverinë, për shkak të mënyrës se si është funksionuar sistemi.
Lala ka përmendur gjithashtu dosjen McGonigal, e cila, sipas saj, cenon drejtpërdrejt partneritetin strategjik midis Shqipërisë dhe Shteteve të Bashkuara të Amerikës, si dhe hedh dritë mbi mënyrën se si funksionon administrata shtetërore në prapaskenë.
Një çështje tjetër e rëndësishme është dosja që lidhet me ministrën Belinda Balluku, e cila përfshin jo vetëm tendera dhe paracaktimin e tyre, por edhe elementë të tjerë të dyshuar për abuzim. Lala ka bërë të ditur se SPAK ka ushtruar kontrolle ndaj disa biznesmenëve në kërkim të provave të reja, të cilat mund të çojnë në implikimin e personave të tjerë të rëndësishëm.