Zef Gjonaj, iniciator i Kuvendit të Veriut të Shqipërisë të të gjithë trojeve shqiptare, mori pjesë në tryezën e organizuar nga Sali Berisha me aleatët politikë dhe përfaqësues të shoqërisë civile më 9 janar 2026.
Gjatë fjalës së tij, Gjonaj shprehu kritikë të ashpra ndaj disa aleatëve pjesëmarrës, duke i cilësuar si politikanë që përfaqësojnë parti pa emër dhe pa elektorat. Ai nuk përmendi emra të veçantë, por pranë tij ishte Selami Jenisheri, përfaqësues i Partisë së Pensionistëve.
Gjonaj nënvizoi se populli shqiptar pret ndryshime nga inteligjenca shqiptare dhe diaspora. Ai e shihte tryezën si takim të njerëzve të ditur për të dhënë zgjidhje situatës aktuale dhe për të sqaruar pozicionin e tyre. "Nëse shkojmë me denoncime, nuk do të fitojmë asnjë herë", tha ai, duke shtuar se në terren hasin njerëz që kanë nevojë për inteligjencën e tyre.
Duke folur për përvojën e tij, Gjonaj deklaroi se ka jetuar gjatë jashtë vendit dhe është kthyer në Shqipëri për të sjellë një kulturë moderne. Ai ironizoi disa pjesëmarrës, duke thënë: "Më vjen mirë kur shoh moshën që janë krah meje që janë politikanë, por me thënë të drejtën kanë ardhur sot të larë, të veshur dhe të mbathur, janë lodhur tre ditë për të gjetur një kollare për të ardhur këtu dhe për të përfaqësuar parti pa emër, pa numër dhe pa elektorat."