Ish-prokurori Eugen Beci, i ftuar në emisionin Studio24, komentoi pjesëmarrjen e të Ngarkuarës me Punë të Shteteve të Bashkuara në Tiranë, Nancy VanHorn, në një aktivitet ku ishin të pranishëm kryeministri Edi Rama dhe zëvendëskryeministrja Belinda Balluku. Kjo e fundit aktualisht ka statusin e të pandehurës në një procedim penal.
Sipas Becit, marrja zyrtarisht e Ballukut si e pandehur ka rëndësi të veçantë në raport me standardet e marrëdhënieve midis autoriteteve amerikane dhe zyrtarëve shqiptarë. Ai shpjegoi se Shtetet e Bashkuara njohin dhe respektojnë institucionet shtetërore shqiptare, por praktikat e tyre nuk lejojnë kontakte zyrtare me persona nën hetim penal. "Nëse Balluku është e pandehur, atëherë autoritetet amerikane nuk duhet të kenë kontakt me të. Nëse nesër ka të pandehur edhe në nivele më të larta, as ata nuk do të takohen nga autoritetet e SHBA-së", u shpreh Beci.
Ish-prokurori u ndal edhe te roli i Strukturës së Posaçme Kundër Korrupsionit dhe Krimit të Organizuar të Rëndë (SPAK), duke deklaruar se kjo strukturë pritet të ketë në fokus shqetësimet e administratës amerikane, veçanërisht termin "narkoterrorizëm". Ky term përshkruan lidhjet mes krimit të organizuar dhe politikës. Beci theksoi se hetimet dhe rezultatet e deritanishme të SPAK tregojnë se grupe të krimit të organizuar kanë ndikuar në zgjedhjen e disa deputetëve. Këta deputetë, sipas tij, më pas kanë favorizuar grupet kriminale në trafikun e paligjshëm dhe në afera korruptive, duke kthyer kështu borxhin politik.