Mijëra turistë kanë mbetur të bllokuar në Lapland të Finlandës të dielën, pasi fluturimet nga aeroporti i Kittilës u anuluan për shkak të të ftohtë ekstrem. Temperaturat ranë deri në -35 gradë Celsius, duke penguar nisjet drejt destinacioneve si Londra, Bristoli, Mançesteri, Parisi dhe Amsterdami.
Agjencia meteorologjike e Finlandës parashikon që temperatura minimale të arrijë -39 gradë Celsius të hënën, ku fluturimi i parë nga Kittilä është anuluar tashmë. I ftohti ekstrem e bën të vështirë shkrirjen e akullit në avionë, ndërsa pajisjet e mirëmbajtjes dhe furnizimit me karburant në tokë rrezikojnë të ngrijnë. Operatori i aeroportit Finavia shpjegon se lagështia e lartë në ajër përkeqëson situatën duke krijuar ngrica të rrëshqitshme.
Laplandi finlandez zakonisht ka temperaturë mesatare dimërore prej -14 gradë Celsius, me rënie të herëpashershme në -30 gradë Celsius, sipas bordit të turizmit të vendit. Aeroporti i Kittilës shërben kryesisht vizitorët që kërkojnë Dritat Veriore dhe vendpushime skie, ndërsa aeroporti i Rovaniemit, më në jug, është pikë kryesore për shtëpinë e Babagjyshit të Krishtlindjeve. Të dielën u anulua një fluturim nga Rovaniemi, ndërsa nisjet nga dhe drejt Kittilës u pezulluan edhe të premten dhe të shtunën.
I ftohti ekstrem në Lapland vjen në mes të një stuhie të fuqishme në Evropën Veriore, që ka shkaktuar ndërprerje udhëtimesh në Mbretërinë e Bashkuar, Francë dhe Gjermani. Në Angli raportohet një viktimë nga rrëzimi i një peme, ndërsa rreth 100 mijë banesa mbetën pa energji elektrike në Francë. Autoritetet finlandeze paralajmërojnë për kushte të rrezikshme akulli në rrugët e rajonit.