Ministri i Drejtësisë, Besfort Lamallari, ka thënë se në muajt e ardhshëm do të prezantohet një platformë e re për zgjidhjen e mosmarrëveshjeve të ndryshme përmes formave alternative, sipas modeleve të vendeve europiane, pa nevojën e detyrueshme për të shkuar në gjykatë. Kjo iniciativë pritet të kontribuojë në uljen e stokut të dosjeve në gjykata.
Në një intervistë për gazetarin Arbër Hitaj në Radio Televizionin Shqiptar, Lamallari solli si ilustrim rastin e një çifti që kërkon të divorcohet pa implikime financiare apo trashëgimtarë. Sipas tij, martesa të tilla mund të zgjidhen lehtësisht te noteri, duke shmangur kohën e gjatë, kostot financiare dhe frustrimin.
"Sot në Shqipëri një çift që vendos që fatet e tyre nuk janë më bashkë, duke kërkuar të zgjidhë martesën, sipas kuadrit ligjor në fuqi dhe proceseve standarde tradicionale prej vitesh që nuk janë sfiduar, duhet të shkojë në gjykatë. Nuk ka arsye që të zvarriten disa çështje, kur në vende të tjera, zgjidhja e martesës kur nuk ka elementë financiarë dhe trashëgimtarë, zgjidhet edhe përmes noterit. Pra, është shprehje e vullnetit para përfaqësuesit ligjor. Kjo ishte sa për ilustrim, por ka shumë hapësira të tjera ligjore që duhen riparë në mënyrë që t'ua lehtësojmë jetën qytetarëve", tha Lamallari.
Ai foli gjithashtu për përdorimin e formave të tjera alternative për zgjidhjen e çështjeve pa gjykatë, si ndërmjetësimi, arbitrazhi dhe pajtimi. Këto forma duhet të sugjerohen për qytetarët edhe nga vetë gjykatat, të cilat në Shqipëri pothuajse nuk i kanë aplikuar deri tani.
Lamallari përmendi mundësinë për përdorimin e teknologjisë dhe të inteligjencës artificiale për zgjidhjen e mosmarrëveshjeve ose për të shmangur vajtjen fizike në gjykata e prokurori për depozitim të dokumenteve. Ai theksoi nevojën që institucionet të zbatojnë këto mekanizma për të përmirësuar shërbimet ndaj qytetarëve.