Paraditen e së martës, më 13 janar 2026, me rastin e 113-vjetorit të krijimit të Policisë së Shtetit, u zhvillua një ceremoni përkujtimore në memorialin e dëshmorëve të policisë, të rënë në krye ose për shkak të detyrës.
Drejtori i Përgjithshëm i Policisë së Shtetit, Drejtues Madhor Ilir Proda, së bashku me Zëvendësministrin e Brendshëm Xhemal Qefalia dhe familjarët e dëshmorëve, vendosën kurora me lule si shenjë respekti dhe mirënjohjeje për veprën e tyre.
Gjatë ceremonisë, Ilir Proda shprehu mirënjohjen e pakufishme dhe nderimet më të larta për dëshmorët e policisë, të cilët janë njëkohësisht dëshmorë të Atdheut. Ai theksoi se gjaku i tyre qëndron në flamurin kombëtar dhe në themelet e kombit.
Në fjalën e tij, Proda deklaroi: “Sakrifica sublime dhe emri i secilit prej ish-kolegëve të rënë gjatë përballjes me krimin janë motive të forta pse Policia e Shtetit është sot më e angazhuar se kurrë, për t’i ruajtur të denja simbolin kombëtar, jetën dhe pronën e çdo qytetari.”
Ceremonia u shoqërua me momente reflektimi, duke përcjellë mesazhin se kujtimi i dëshmorëve mbetet i përjetshëm dhe vazhdon të frymëzojë misionin e përditshëm të policisë. Lavdi veprës dhe sakrificës së dëshmorëve të Policisë së Shtetit.