Një nënkalim për vetura në qytetin e Malishevës u përmbyt më 6 janar 2026, si pasojë e reshjeve të shiut. Ky nënkalim u përuroi në gusht të vitit 2025 me një koncert dhe fjalime zyrtare nga ana e komunës.
Nënkalimi është pjesë e projektit infrastrukturor Malisheva Urbane, me vlerë afër 9 milionë euro. Projekti përfshin gjithashtu shesh dhe parkingje nëntokësore, të ndërtuara kryesisht nga kompania B Famis nga Suhareka. Kryetari i komunës, Ekrem Kastrati, e ka cilësuar këtë si një nga projektet më të mëdha në historinë e Malishevës.
Sipas komunës, përmbytja ndodhi për shkak të shiut të rrëmbyeshëm dhe rritjes së nivelit të ujit në lumin Mirusha dhe një degë të tij, çka pengoi shkarkimin e ujit. Të nesërmen, nënkalimi u pastrua nga kompania komunale e pastrimit dhe u rihap për qarkullim.
Komuna nuk e lidh përmbytjen me cilësinë e punimeve, por pranon se pranimi teknik i projektit nuk ka përfunduar plotësisht. Përurimi u bë vetëm për pjesën e rrugëve, ndërsa projekti si tërësi mbetet i papërfunduar. Pranimi teknik verifikon nëse punimet janë kryer sipas kontratës dhe projektit, dhe shërben si leje shfrytëzimi.
Kompania ndërtuese B Famis nuk ka dhënë shpjegime për incidentin. Komuna nuk specifikoi nëse pranimi teknik i nënkalimit është bërë veçmas.