Në qarkun e Fierit ka nisur procesi i verifikimit të dëmeve të shkaktuara nga përmbytjet në fshatrat Ferras dhe Mbrostar. Grupet e punës në terren po evidentojnë dëmet në banesa, orendi, infrastrukturë, bujqësi dhe blegtori. Ky proces, sipas autoriteteve vendore, është kompleks dhe do të vazhdojë gjatë ditëve në vijim, duke kërkuar bashkëpunim të ngushtë me banorët e prekur.
Nënkryetari i Bashkisë Fier, Nusret Avdullai, në një prononcim për mediat, theksoi se verifikimi nuk është procedurë e lehtë. Ai apeloi për ndërgjegjësim më të madh të qytetarëve ndaj njoftimeve paraprake për rrezikun dhe marrjen e masave mbrojtëse. "Thirrjet për evakuim nuk bëhen rastësisht, por bazohen në vlerësime dhe rreziqe reale. Banorët duhet t’u përgjigjen këtyre njoftimeve në kohë, për të shmangur situata të rrezikshme për jetën dhe pronën", deklaroi Avdullai.
Ministri i Mbrojtjes, Pirro Vengu, ka inspektuar nga afër gjendjen në zonë dhe u ka garantuar banorëve mbështetje të menjëhershme. Ai premtoi sigurimin e bazës ushqimore për familjet e prekura dhe transferimin e bagëtive në ambiente më të sigurta, konkretisht në tregun e gjallë në Fier. Në Mbrostar, situata është veçanërisht problematike për shkak të rritjes së nivelit të lumit Seman, ku janë raportuar ngordhje të bagëtive dhe humbje të konsiderueshme për fermerët. Një banor theksoi se po tentojnë të sigurojnë ushqim për bagëtitë e mbetura.
Prurjet e lumit Seman pritet të kenë tendencë rritjeje pas mesditës, çka e bën situatën më delikate. Strukturat vendore dhe ato të emergjencave civile po mbajnë në monitorim të plotë zonën dhe janë në gatishmëri për ndërhyrje të menjëhershme. Autoritetet u bëjnë thirrje qytetarëve të qëndrojnë të informuar, të respektojnë udhëzimet zyrtare dhe të shmangin zonat e rrezikuara deri në përmirësimin e situatës.