Banka e Shqipërisë zhvilloi ankandin për obligacionet 20-vjeçare më 6 janar 2026, duke shitur 1.73 miliardë lekë instrumente financiare me normë interesi 6.72%. Kjo normë ra nga 6.88% e regjistruar në ankandin e fundit të shtatorit 2025, kryesisht për shkak të kërkesës së lartë nga investitorët.
Vlera e planifikuar fillestare ishte 1.5 miliardë lekë, por kërkesa totale arriti 2.92 miliardë lekë, çka solli rritjen e emetimit në 1.73 miliardë lekë nga ana e Ministrisë së Financave. Kjo tregon interes të lartë nga investitorët institucionalë, të cilët shohin në këto obligacione një alternativë të mirë për diversifikimin e portofolit dhe likuiditetin në tregun dytësor.
Obligacionet 20-vjeçare u prezantuan për herë të parë në janar 2025 dhe u pritën me interes të madh, duke çuar në organizimin e tre ankandeve të tjera gjatë vitit 2025. Ato konsiderohen instrumentet më afatgjata të borxhit në tregun e brendshëm financiar shqiptar.
Për tremujorin e parë të vitit 2026, huamarrja e qeverisë në tregun e brendshëm parashikohet të rritet lehtë në 134 miliardë lekë, me një rritje prej 1.1% krahasuar me të njëjtën periudhë të vitit 2025. Kjo rritje vjen sipas kalendarit të emetimeve të Ministrisë së Financave, ndërsa në afat të gjatë huamarrja e brendshme ka shënuar rënie për shkak të uljes së borxhit publik dhe orientimit drejt tregjeve ndërkombëtare.