Raporti i Kontrollit të Lartë të Shtetit (KLSH) nxjerr në pah dëme ekonomike prej gati 2.5 miliardë dollarësh nga përmbytjet në Shqipëri gjatë tre dekadave të fundit, nga viti 1990 deri më sot. Sipas këtij raporti, asnjë përfaqësues i institucioneve përgjegjëse për mirëmbajtjen e sistemit hidrik, vlerësimin e riskut para dhe gjatë emergjencave nuk ka dhënë llogari para drejtësisë dhe as është gjetur fajtor.
Auditimi u zhvillua pas përmbytjeve të vitit 2024 në qytetin e Vlorës, ku u shqyrtuan qindra dokumente mbi hartat, kanalizimet, hidrovorët dhe kontratat e mirëmbajtjes. KLSH evidenton mungesën e pastrimit të kanaleve kulluese prej dekadash nga institucionet përgjegjëse, si dhe mosmenaxhimin efektiv të riskut kombëtar nga përmbytjet, i cili nuk është përshtatur me kushtet klimatike. Kjo situatë bie në kundërshtim me ligjin për mbrojtjen civile.
Raporti thekson se 3.285 objekte janë ndërtuar pa leje në infrastrukturën ujitëse, kulluese dhe të mbrojtjes. Problemet e tjera përfshijnë mosbashkëpunimin midis institucioneve për menaxhimin e situatave emergjente dhe mungesën e mirëmbajtjes së sistemit kullues. KLSH ka shqyrtuar përgjegjësitë në nivel qendror dhe lokal, duke filluar nga Ministria e Bujqësisë deri te ndërmarrjet që administrojnë argjinaturat dhe kanalizimet.
Nga viti 1990 janë regjistruar tetë përmbytje të rënda në Shqipëri:
- Përmbytja e vitit 1995;
- Shtatori 2002, kur u prekën 7.500 familje kryesisht në Torovicë, Lezhë dhe Milot;
- Shkurt-mars 2004, përmbytjet e Drinit dhe Bunës;
- Dhjetor 2005, përmbytjet në Jug nga Vjosa;
- Përmbytjet e Nënshkodrës 2010-2011, gjatë të cilave u evakuuan 12 mijë shtetas;
- Shkurt 2015, përmbytja e Jugut ku u dëmtuan plotësisht 709 shtëpi;
- Nënntori 2017, përgjatë rrjedhës së Vjosës ku u dëmtuan 4.700 banesa;
- Përmbytjet e viteve 2021 dhe 2024 në zona si Lezhë dhe Shkodër.
Ky raport nxjerr në pah nevojën për masa të menjëhershme për të shmangur dëmet e ardhshme.