Në të gjithë territorin e Qarkut Kukës, reshjet e shiut me intensitet të ulët deri në mesatar kanë rritur rrezikun për rrugët nacionale, bashkiake dhe ura. Si pasojë, subjektet kontraktore dhe drejtoritë e rrugëve rurale punojnë me kapacitet maksimal për të garantuar qarkullueshmërinë. Të gjitha akset rrugore nacionale mbeten të hapura për qarkullim.
Problematika kryesore raportohet në Bashkinë Kukës, ku ura e fshatit Orgjost është dëmtuar në njërën nga këmbët mbajtëse, duke e vënë në rrezik shembjen. Kjo situatë kërcënon me izolim rreth 1000 banorë të dy lagjeve të fshatit. Banorët kanë raportuar se fëmijët nuk janë lejuar të shkojnë në shkollë sot për shkak të përkeqësimit të kushteve dhe kërkojnë ndërhyrje të menjëhershme nga strukturat e emergjencave civile në nivel lokal dhe qendror.
Vijojnë të jenë të bllokuara segmenti rrugor i Njësisë Administrative Zapod, si dhe rrugët Cërnalevë dhe Oreshkë. Në zonën e Cërnalevës, mësimi nuk është zhvilluar sot për nxënësit për shkak të motit të keq. Në aksin Kukës-Shishtavec, ka pasur rrëshqitje dherash dhe gurë që kanë penguar qarkullimin, por puna për heqjen e tyre vazhdon.
Në Bashkinë Tropojë, nuk raportohen probleme të mëdha. Në Bashkinë Has, mbetet shqetësues rezervuari Helshan 2, pasi poshtë tij ndodhet një objekt shkollor. Sa i përket energjisë elektrike, i gjithë qarku furnizohet normalisht, përjashtuar Njësitë Administrative Zapod, Shishtavec dhe Topojan në Bashkinë Kukës, ku ndërprerjet vazhdojnë. Situata monitorohet vazhdueshëm nga autoritetet përkatëse.