Në qarkun e Fierit, reshjet e shiut kanë krijuar një situatë të tensionuar përgjatë argjinaturës së Çervenit, ku autoritetet lokale po punojnë për të parandaluar daljen e lumit Vjosë nga shtrati. Emergjencat Civile të Bashkisë Fier, së bashku me kryebashkiakun Armando Subashi, janë në terren për të monitoruar dhe ndërhyrë në zonën e prekur.
Punimet intensive po kryhen me dy fadroma dhe mjete të tonazhit të rëndë, të cilat po riparojnë segmentet e dëmtuara të argjinaturës. Sipas autoriteteve, reshjet vazhdojnë me intensitet të lartë, duke rritur rrezikun e përmbytjeve. Niveli i lumit Vjosë ka arritur në 8,6 metra, çka ka detyruar evakuimin e 13 familjeve në zonën e afërt.
Autoritetet shprehin shpresë për përmirësim të situatës, duke iu referuar prurjeve në lumin Vjosë nga zona e Memaliajt. Monitorimi vazhdon pa pushim, me qëllim mbajtjen nën kontroll të nivelit të ujit dhe shmangien e dëmeve të mëtejshme.